Սեպտեմբերի 27-ին Գորիսի քաղաքապետարանում անցկացվեց «Տեղական ինքնակառավարման մարմինների լիազորությունների իրականացման նկատմամբ կազմակերպվող և իրականացվող վերահսկողության մեխանիզմները։ Հանրային վերահսկողության մեխանիզմները» թեմայով ՏԻՄ-ՔՀԿ սեմինար-քննարկում:
Այն անցկացվեց Եվրամիության կողմից ֆինանսավորվող «Կառուցողական երկխոսության հանձնառություն» ծրագրի շրջանակում:
Բացման խոսքում Հայաստանի համայնքների միության նախագահ Էմին Երիցյանը նշեց, որ մարզային այսպիսի քննարկումների նպատակն է տարբեր թեմատիկաներով քննարկումներ կազմակերպելը, որոնցից կարևորներից մեկը տեղական ինքնակառավարման մարմինների նկատմամբ վերահսկողությունն է, թե այն ինչ ձևով է տեղի ունենում և հանրային վերահսկողությունը:
Տեղական ինքնակառավարման հարցերով փորձագետ Վահագն Պետրոսյանը ներկայացրեց տեղական ինքնակառավարման մարմինների լիազորությունների իրականացման նկատմամբ կազմակերպվող և իրականացվող վերահսկողության մեխանիզմների, հանրային վերահսկողության մեխանիզմների թեմայով խնդիրներ, իրավական կարգավորումներ, պատասխանեց քննարկման մասնակիցների հարցերին:
Քննարկման ընթացքում անդրադարձ կատարվեց նաև օրենսդրական փոփոխություններին:
«Կառուցողական երկխոսության հանձնառություն» ծրագիրը մեկնարկել է 2016 թ. դեկտեմբերին: Տևողությունը 34 ամիս է: Ծրագիրը ֆինանսավորվում է Եվրոպական միության կողմից և իրականացվում «Իրավաբանների հայկական ասոցիացիա» ՀԿ-ի (ղեկավար կազմակերպություն), Մարդկային զարգացման միջազգային կենտրոնի, Հայաստանի համայնքների միություն (ՀՀՄ) ԻԱՄ-ի, «Ժողովրդավարական կրթության հայկական կենտրոն-ՍԻՎԻՏԱՍ» ՀԿ-ի, «Փոքր և միջին ձեռնարկատիրության համագործակցության ասոցիացիա» ՀԿ-ի, ինչպես նաև «Ագորա Սենթրալ Յուրըփ» չեխական ՀԿ-ի համատեղ կոնսորցիումով:
